पीपीएल क्रिकेटः सन्दिपको लगातार दोस्रो हार, धनगढीको शानदार जित !

काठमाडौँ, ११ कात्तिक । पोखरामा जारी पोखरा प्रिमियर लिग पीपीएल क्रिकेटमा विराटनगर लगातार दोस्रोपटक पराजित भएको छ । आइतबार भएको खेलमा पहिलो जित निकाल्ने क्रममा धनगढीले विराटनगरलाई पराजित गरेको हो ।

एक सय ८३ रनको लक्ष्य पछ्याएको विराटनगर मात्र एक सय ४ रन बनाएर अल आउट भएपछि धनगढीले खेल ७८ रनले जितेको हो । विराटनगरका लागि सुनिल धमलाले २१ मोहमद आलमले १९, एन्ड्रि सुभिक्षणले १८ र कप्तान सन्दिप लामिछानेले १० रन बनाउनु बाहेक अन्यले सम्झन लायक प्रदर्शन गर्न सकेनन् । धनगढीका डेन ल्वरेन्सले ३ र कप्तान दिपेन्द्र सिँह ऐरीले २ विकेट लिए ।

यसअघि पोखरा क्रिकेट रंगशालामा टस हारेर पहिले ब्याटिङ गरेको धनगढी ब्लुजले निर्धारित २० ओभरमा सबै विकेट गुमाएर एक सय ८२ रन बनाएको थियो । धनगढीका लागि पिटर ट्रेगोले ५३, सौरभ खनालले ४३ र कप्तान दिपेन्द्र सिँह ऐरीले २९ रन बनाए । विराटनगरका जितेन्द्र मुखिया एक्लैले ४ विकेट लिए ।

यो विराटनगरको लगातार दोस्रो हार हो । यस अघि प्रतियोगिताको पहिलो खेलमा नै आयोजक पोखरासँग पाराजित भएको थियो । त्यस्तै शनिबार काठमाडौँसँग पराजित भएको धनगढीले आफ्नो पहिलो जित दर्ता गरेको हो ।

अाइतबार कै अर्काे खेलमा बुटवल ब्लास्टर्स र पाेखरा पल्टन भिड्नेछन् । खेल दिउसाे १ः१५ बाट शुरु हुनेछ ।