पौडी–पदाधिकारीका षडयन्त्रको शिकार बन्दै कीर्तिमानी खेलाडी गौरीका

कीर्तिमानी चर्चित पौडी खेलाडी गौरीका सिंह नेपाल पौडी संघका पदाधिकारीहरूको षडयन्त्रको शिकार भएकी छिन् । गौरीलाई अन्तर्राष्ट्रिय प्रतियोगितामा सहभागी हुनबाट वञ्चित तुल्याउन संघले यस्तो षडयन्त्र गरेको जानकारीमा आएको छ ।

कुनै पनि अन्तर्राष्ट्रिय प्रतियोगितामा सहभागिता जनाउन राष्ट्रिय प्रतियोगिता खेल्नु अनिवार्य गरिएको छ । यतिबेला बेलायतमा रहेकी गौरीकाले अन्तर्राष्ट्रिय प्रतियोगितामा सहभागिता जनाउनकै निम्ति राष्ट्रिय प्रतियोगिता खेल्न जरुरी छ । त्यसको लागि गौरीका र उनका अभिभावकले नेपाल पौडी संघका पदाधिकारीसँग सम्पर्क गर्दै आइरहेकी छिन् ।

तर विडम्बना ! पौडी संघले पटक–पटक राष्ट्रिय प्रतियोगिताको मिति तय गर्ने र सार्ने गर्दै आएपछि गौरीकालाई अन्तर्राष्ट्रिय प्रतियोगितामा सहभागिता जनाउन नपाउने सन्त्रासले पिरोलेको छ । पौडी संघसम्बद्ध एक विश्वस्त स्रोतका अनुसार गौरीकालाई संघले एउटा समय दिने, उनी त्यो टाइम ‘मीट’ गर्न नेपाल आइपुग्दा फेरि संघले समय परिवर्तन गरिदिने उपक्रम चचेको छ । यो उनलाई दुःख दिनकै लागि गरिएको स्रोतको दाबी छ । यो कतै गौरीकाको खेल–जीवन नै समाप्त गर्ने दुर्उद्देश्यले संघले चलखेल गरिरहेको त होइन भन्ने आशङ्का समेत एकथरिले गरेका छन् । पौडी संघको यस्तो रवैयाबाट गौरीकाका अभिभावक पनि सशंकित भएका बुझिएको छ ।

राष्ट्रिय प्रतियोगिता खेल्न नपाए नेपालमा आयोजना हुने १३ औँ दक्षिण एसियाली खेलकुद प्रतियोगिता (साग), आउँदो वर्ष इण्डोनेसियामा आयोजना हुने एसियाली खेलकुद प्रतियोगिता र जापानको टोकियोमा हुने ओलम्पिक खेलकुदसमेत गौरीकाले गुमाउनुपर्ने हुन्छ । राष्ट्रिय प्रतियोगिता नखेली एसियाली र ओलम्पिक छनोट प्रतियोगितामा सहभागी हुन पाइँदैन ।

गौरीकाले राष्ट्रिय प्रतियोगितामा सहभागिता जनाए अन्य खेलाडीहरू पाखा लाग्ने पक्का छ । नेपालमा गौरीकालाई उनको समूहमा चुनौती दिने महिला खेलाडी हालसम्म देखिएको छैन । महिला त के पुरुष खेलाडी पनि गौरीकालाई चुनौती दिन सक्दैनन् । यो कुरा पौडी संघका पदाधिकारीले राम्रोसँग बुझेका छन् । त्यसैले पौडी संघले गौरीकालाई राष्ट्रिय प्रतियोगिताबाट टाढा राख्न यस्तो रणनीति अख्तियार गरेको हुनसक्ने अड्कल काटिन थालेको छ । यस्तो चलखेल गर्नुमा संघका पदाधिकारीका छोराछोरी तथा आफन्तहरू नै पौडी खेलाडी रहनु र गौरीकाको क्षमतासामु उनीहरू टिक्न नसक्ने कारण रहेको बताइन्छ । ज्ञातव्य छ, गरिमा राणाकी छोरी गौरीका नेपालकी कीर्तिमानी पौडी खेलाडी हुन् । उनले भारतको गुवाहटी र सिलोङमा सम्पन्न १२औँ सागमा उत्कृष्ट प्रदर्शन गरेकी थिइन् । विडम्बना ! पौडी संघको षडयन्त्रले गर्दा गौरीका राष्ट्रिय प्रतियोगिताबाट वन्चित हुने अवस्था श्रृजना भैरहेको छ । गम्भीर कुराचाहिँ के छ भने परोक्ष रूपले पौडी संघले यस्तो चलखेल गर्दा पनि खेलकुदको सर्वोच्च निकाय राष्ट्रिय खेलकुद परिषद भने अझै यसबारे अनविज्ञ नै छ । यो खुलासापश्चात् अब राखेपले गौरीकामाथि पौडी संघले गरेको अन्यायबाारेमा कस्तो कदम चाल्छ, तीव्र प्रतीक्षाको सन्दर्भ बन्न पुगेको आजको घटना र विचार साप्तहिकमा खबर छ  ।