प्रचण्डले बिप्लवलाइ भने ‘लहडले नेता बनिंदैन ‘

काठमाडौं,१७ भदाै। नेपाल कम्युनिष्ट पार्टी (नेकपा)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले एकीकृत जनक्रान्तिमार्फत क्रान्ति गर्ने अभियानमा रहेको बिप्लव नेतृत्वको नेकपा परित्याग गरी नेकपामा प्रवेश गरेका नेता कार्यकर्ताहरुलाई  अाइतबार खुलमटारस्थित निवासमा टीका लगाएर स्वागत गरेका छन् ।

बिप्लव नेतृत्वको नेकपा परित्याग गरी नेकपामा प्रवेश गर्नेमा गणतान्त्रिक खेलकूदका वरिष्ठ उपाध्यक्ष बिमला संग्रौला, उपत्यका ब्यूरो सदस्य रामप्रसाद घिमिरे, काठमाडौँ जिल्ला सदस्य डिल्लीराम थपलिया, गोपाल खरेल, भक्तपुर जिल्ला सदस्य राजराम लाथेजु, काठमाडौँ जिल्ला क्षेत्र नं २ का माधव लामिछाने र विष्णु तिमल्सेनालाई नेकपा (नेकपा) का अध्यक्ष प्रचण्डले  टीका तथा खादा लगाएर स्वागत गरेका हुन् ।

नवप्रवेशीहरुले अबको समाजवादी क्रान्तिको नेतृत्व नेकपाबाट मात्र सम्भव देखिएको भन्दै आफूहरु प्रवेश गरेको बताएका छन् । कार्यक्रममा नेकपा अध्यक्ष प्रचण्डले भने ‘कसैलाई रहर लागेर नेता हुनसक्ने होइन । इतिहास र जनताले आन्दोलनको क्रममा पार्टी, नेता र विचारको विकास गर्ने कुरा हो । लहडले नेता बनिंदैन ।’