प्रधानमन्त्रीको भारत भ्रमणका लागि गृहकार्य शुरु

काठमाडौँ, १४ चैत । नेकपा (एमाले)का नेता डा राजन भट्टराईले प्रधानमन्त्री केपी शर्मा ओलीको भारत भ्रमणको एजेण्डा तय गर्न आन्तरिक गृहकार्य शुरु भइसकेको बताउनुभएको छ ।

रिपोर्टर्स क्लब नेपालले आज आयोजना गरेको साक्षात्कारमा नेता भट्टराईले आसन्न भारत भ्रमणमा दुई देशबीचको कूटनीतिक सम्बन्ध बलियो बनाउने र आर्थिक विषयमा कुराकानी हुने जानकारी दिनुभयो ।

भ्रमणका समय धेरै कुरामा हात हाल्ने भन्दा पनि महत्वपूर्ण विषयमा मात्रै कुरा राख्ने प्रधानमन्त्रीको दृष्टिकोण रहेको बताउँदै उहाँले भन्नुभयो, “हामीले खासगरेर भारतसँग पूर्वाधार विकासमा जोड दिएका छौँ ।” समयसीमाभित्रै सम्पन्न आयोजनामा केन्द्रित रहेर कुराकानी गरिने बताउँदै उहाँले भन्नुभयो, “भारतसँग हाम्रो बहुआयामिक सम्बन्ध छ, हवाई, विद्युत्, जलस्रोत, कृषिसम्बन्धी जोडिएका विषयमा पनि कुरा हुन्छ, नेपालमा भ्रमणको तयारी भइरहेको छ ।”

राष्ट्रिय योजना आयोगका पूर्वउपाध्यक्ष डा मीनबहादुर श्रेष्ठले मुलुकमा राजनीतिक स्थिरता कायम भएको हुँदा अब प्रधानमन्त्री ओलीले वैदेशिक लगानीको विषयलाई प्राथमिकता दिनुपर्नेमा जोड दिनुभयो ।

उहाँले वाम गठबन्धनले चुनावमा जनता सामु गरेका प्रतिबद्धता अब सरकारले पूरा गर्नुपर्ने बताउँदै आगामी नीति तथा कार्यक्रममा देशले समृद्धि हासिल गर्ने गरी सरकारले आफ्ना योजना ल्याउनुपर्ने विचार राख्नुभयो ।

राष्ट्रिय योजना आयोगका पूर्वउपाध्यक्ष डा शंकर शर्माले प्रधानमन्त्रीले आसन्न भारत भ्रमणमा लगानीको विषयमा कुरा गर्नुपर्नेमा जोड दिँदै नेपालको व्यापार घाटा भारतसँग भएका कारण स्वदेशी सामान बढीभन्दा बढी भारत निर्यात गर्ने गरी दृष्टिकोण राख्नुपर्ने बताउनुभयो ।
मुलुकमा पूँजीगत खर्च हुन नसकेको अवस्थामा रोजगारी सिर्जना नहुने हुँदा विकासका लागि सरकारले पूँजीगत खर्च बढाउनुपर्नेमा उहाँले जोड दिनुभयो ।