फ्रान्समा छात्रालाई विद्यालयभित्र बुर्काजस्तै देखिने पोसाक अबाया लगाउन प्रतिबन्ध

पेरिस। फ्रान्सका सरकारी विद्यालयमा अध्ययनरत छात्राहरुलाई पूरै शरीर ढाक्ने कपडा पोसाक अबाया लगाउन प्रतिबन्ध लगाइएको छ। बुर्काजस्तै देखिने यो पहिरन मुस्लिम धर्मावलम्बीहरुले विद्यालयमा पनि लगाउन थालेपछि धर्म निरपेक्ष मुलुक फ्रान्सले प्रतिबन्धको घोषणा गरेको हो ।

कसैको पहिरन हेरेर धर्म पहिचान गर्न सक्ने भएकाले अबायालाई विद्यालयमा प्रतिबन्ध लगाइएको फ्रान्सका शिक्षा मन्त्री गाब्रिएल अट्टलले बताए। विद्यालयमा सबै समान भएको भन्दै कुनै पनि धर्म र सम्प्रदायको पहिचान पोसाकबाट विद्यालयमा देखिनु नहुने उनको भनाइ छ।

आगामी सेप्टेम्बर ४ बाट शुरु हुने विद्यालयको नयाँ शैक्षिकशत्रमा कडाइका साथ धार्मिक पहिचान खुल्ने पहिरन आबाया लगाउन नपाइने शिक्षा मन्त्रीको घोषणामा उल्लेख छ।

यस्तो पहिरनले फ्रान्सको कडा धर्म निरपेक्ष कानुन उल्लंघन हुने बताइएको छ। सन् २००४ देखि नै फ्रान्सका सरकारी विद्यालयमा टाउको छोप्ने हेड स्कार्फ लगाउन प्रतिबन्ध लगाइएको थियो।