बर्षाका कारण खेल रद्द

काठमाडौँ, १३ साउन । लर्डसमा हुँदै गरेको त्रिकोणात्मक क्रिकेट प्रतियोगितामा नेदरल्याण्ड र नेपालबीचको खेल वर्षाका कारण रद्द भएको छ । टस हारेर ब्याटिङ्मा उत्रिएको नेदरल्याण्डले खेल रोकिनुभन्दा अघि १६ ओभर ४ बलमा ४ विकेट गुमाएर १७४ रन बनाएको थियो । यसअघि १२ ओभरको खेल सकिँदा वर्षाका कारण अवरुद्ध भएको खेल केही मिनेट पछि पुन सुचारु भएको थियो।

एमसिसि(मेरिलबन क्रिकेट क्लब)को आयोजनामा भएको २० ओभरको त्रिकोणात्मक शृङ्खलामा एमसिसि, नेदरल्याण र नेपाल सम्मिलित थिए । प्रतियोगिताका सबै खेल आज सकिएका छन् । प्रतियोगिताको पहिलो खेल एमसिसि र नेदरल्याण्डबीच थियो जुन वर्षाका कारण अवरुद्ध भयो भने दोस्रो खलमा नेपालले एमसिसिलाई नेपालले ९ विकेटले हराएको थियो । वर्षाका कारण ६ ओभरमा खेलाईएको उक्त खेलमा एमसिसिले ४ विकेटको क्षतिमा ४० रन बनाएको थियो भने ४१ रनको लक्ष्य नेपालले १ विकेट गुमाएर ४.४ ओभरमा भेटायो ।

आउने अगस्त १ र ३ मा नेपालले नेदरल्याण्ड विरुद्ध ऐतिहासिक एकदिवसिय शृङ्खला खेल्दैछ ।v