बेइजिङमा सम्झौता हुँदा ल्हासाका नेपाली यसकारण खुशी

प्रधानमन्त्री ओलीले राष्ट्रपति सी चिनफिङ र प्रधानमन्त्री लि खछ्याङसँग बेइजिङमा भएको भेटवार्ता र सहमतिका आधारमा नेपाल र चीनबीचको सम्बन्ध थप नयाँ उचाइमा पुगेको र तिब्बत सरकारसँगको सम्बन्धसमेत थप प्रगाढ बनेको भन्दै खुशी व्यक्त गरेका थिए।

बेइजिङबाट एयर चाइनाको विमानबाट उडेको प्रधानमन्त्री ओलीको टोली अपरान्ह ल्हासा उत्रिँदा विमानस्थलमै भव्य स्वागत गरिएको थियो।

ऐतिहासिक कालदेखि नै नेपाल तिब्बत सम्बन्ध रहेको भन्दै बदलिँदो अवस्थामा त्यसलाई अझ फराकिलो र मैत्रीपूर्ण बनाउँदै सहयोगका विविध आयाममा समेत एक अर्का पक्षले जोड दिँदै कार्यान्वयनमा लैजान ओलीले छिटालासँग आग्रह गरे।

तिब्बत सरकारका अध्यक्ष छिटालाले नेपाल र तिब्बतबीचको सम्बन्ध अझ समृद्ध बन्ने विश्वास व्यक्त गरे। ‘तिब्बत सरकारका तर्फबाट नेपाललाई सधैँ सहयोग रहनेछ’ भन्दै छिटालाले आपसी हित र चासोका विषयलाई सम्बोधन गर्दै जाने विश्वास दिलाए।

‘चीनको ‘एक क्षेत्र, एक मार्ग’लाई सघन कार्यान्वयनका लागि हिमाली सीमापार बहुआयामिक सम्पर्क सञ्जालको कार्य ढाँचाअन्तर्गत सडक, रेल, हवाई र सञ्चार सम्पर्कलाई व्यापक बनाउन दुई देश सहमत भएको विषय संयुक्त वक्तव्यमा समेत आएको छ’ भन्दै प्रधानमन्त्री ओली र अध्यक्ष छिटालाले उक्त सम्झौता कार्यान्वयनका लागि दुवै पक्ष मिलेर अगाडि बढ्न सहमत भए।

अन्तरदेशीय प्रसारण लाइन, तिब्बती राजमार्ग नेपालले प्रयोग गर्ने विषयमा प्रधानमन्त्री तहमा भएको सहमति तथा पर्यटन प्रवद्र्धन, सीमा व्यवस्थापन र नेपालीलाई तिब्बत सरकारले दिएको सुविधाको विषयमा समेत सो अवसरमा छलफल भएको थियो।

भेटवार्तामा प्रधानमन्त्री पत्नी राधिका शाक्य, गृहमन्त्री रामबहादुर थापा, परराष्ट्रमन्त्री प्रदीपकुमार ज्ञवाली, ऊर्जा, जलस्रोत तथा सिँचाइमन्त्री वर्षमान पुन, भौतिक पूर्वाधार तथा यातायातमन्त्री रघुवीर महासेठलगायत नेपाली प्रतिनिधिमण्डलको सहभागिता थियो । प्रधानमन्त्री ओली र नेपाली प्रतिनिधिमण्डलको सम्मानमा अध्यक्ष छिटालाले रात्रिभोजको आयोजना गरे।