मोदी र ओलीले संयुक्त रुपमा रामायण करिडोर उद्घाटन गर्ने

वैशाख २५, काठमाण्डौ । २८ वैशाखमा नेपालको राजकीय भ्रमणमा आउन लागेका भारतीय प्रधानमन्त्री नरेन्द्र मोदीलाई जनकपुर विमानस्थलमा रक्षामन्त्री ईश्वर पोखरेलले स्वागत गर्ने भएका छन् । सोमबार बसेको मन्त्रिपरिषद् बैठकले मोदीलाई रक्षामन्त्रीले स्वागत गर्ने निर्णय गरेको हो ।

मोदी पटनाबाट हेलिकोप्टरमा २८ वैशाख बिहान ९ः३० बजे जनकपुर विमानस्थल ओर्लिनेछन । प्रधानमन्त्री ओलीले समकक्षी मोदीलाई जानकी मन्दिरमा स्वागत गर्नेछन् । लगत्तै दुवै प्रधानमन्त्रीले संयुक्त रूपमा पूजापाठ गर्ने कार्यक्रम तय भएको छ ।

नेकपा एमालेका नेता तथा परराष्ट्रविद डा.राजन भट्टराईले मोदीको भ्रमणका बेला सिमा समस्या, १९५० को सन्धी, व्यापार घाटा, जलस्रोतको साझेदारी लगायतका विषयमा छलफल हुने बताएका छन् ।

पारवाहन सन्धीको विषयलाई पनि उठान गर्नुपर्ने उनले बताए ।

“रक्सौलदेखि काठमाण्डौसम्म रेल सेवा विस्तार गर्ने कुरामा थप छलफल गर्नुपर्छ । कृषि क्षेत्रको साझेदारीलाई कसरी अगाडि बढाउने भन्नेमा कुरा गर्नुपर्छ । टुङ्गिएर पनि कार्यान्वय नभएका अरु विषयमा पनि छलफल गर्नुपर्छ ।” उनले भने ।

मोदीले जनकपुर भ्रमणका बेला रामायण करिडोर उद्घाटन हुने बताएका छन् ।

“अयोध्या र जानकी मन्दिरकाबीचमा ऐसिहासिक सम्बन्ध छ, त्यसलाई झल्काउने गरी रामायण करिडोर भनेर राम–सितासँग जोडिएको विषयलाई उद्घाटन गर्ने कुरा छ ।” भट्टराईले भने ।

ओली र मोदीले संयुक्त रुपमा करिडोरको उद्घाटन गर्ने कार्यक्रम रहेको उनले जानकारी दिए ।
भारतीय प्रधानमन्त्री मोदीको उच्चस्तरीय भ्रमण भएकाले राजनीतिक तहको कुराकानी बढि हुनुपर्ने उनेको तर्क छ । वैदेशिक सम्बन्धका हिसाबले पनि महत्वपूर्ण भ्रमण भएकाले यस्ता भ्रमणलाई फलदायी बनाउनुपर्ने उनले बताए ।