मोबाईल स्क्रिन ग्लाससहित पटाका बरामद

काठमाडौं, २६ कात्तिक । विभिन्न किसिमका पटाका र नेश्नल कुरियरले पठाएको बिल नभएको १३ कार्टुन मोबाईल स्क्रिन ग्लास बुधबार बिहान प्रहरीले बरामद गरेको छ ।
चन्द्रागिरी नागढुङ्गाबाट साढे चार बोरा विभिन्न किसिमका पटाका र नेश्नल कुरियरले पठाएको बिल नभएको १३ कार्टुन मोबाईल स्क्रिन ग्लास बरामद गरेको हो ।

मलंगवाबाट काठमाडौंतर्फ आउँदै गरेको ना.५ ख २७७० नम्बरको यात्रु बाहक बसमा महानगरीय प्रहरी प्रभाग नागढुङ्गाबाट खटिएको प्रहरीले जाँच गर्नेक्रममा उक्त पटाका र मोबाईल स्क्रिन ग्लास फेला पारी बरामद गरेको जनाएको छ ।

त्यस्तै, सुनसरीको गढी गाउँपालिका(३ छिटाहास्थित सडकबाट १५ हजार रुपैयाँ मूल्य बराबरको विभिन्न किसिमका पटाकाहरू मंगलबार दिउँसो प्रहरीले बरामद गरेको छ । ईलाका प्रहरी कार्यालय दुहबीबाट खटिएको प्रहरीलाई देख्नासाथ अपरिचित व्यक्तिले उक्त पटाका सोही ठाउँमा छोडेर फरार भएपछि प्रहरीले उक्त पटाका बरामद गरेको हो । घटनामा संलग्न रहेको आशंकामा २ जनालाई प्रहरीले नियन्त्रणमा लिएको बताएको छ । यस सम्बन्धमा स्थानीय प्रहरीले थप अनुसन्धान गरिरहेको जनाएको छ ।