सत्तारुढ दलमा खटपटको आशंका, मन्त्रिपरिषद् बैठक स्थगित

काठमाडौं। मन्त्रिपरिषद्को बैठक स्थगित भएको छ । प्रधानमन्त्री केपी शर्मा ओलीले आज (मंगलबार) साँझ ६ बजेका लागि बालुवाटारमा बैठक बोलाएका थिए । सत्तारुढ दल एमाले र कांग्रेसबीच चिनियाँ विकास परियोजना बीआरआईको सम्बन्धमा मत्यैक्यता नहुँदा मन्त्रिपरिषद् बैठक बस्न नसकेको एक मन्त्रीले रिपोर्टर्स नेपाललाई जानकारी गराए ।

ती मन्त्रीका अनुसार कांग्रेस–एमालेका नेताहरुबीच अहिले बीआरआईबारे गरमागरम बहस चलिरहेको छ । प्रधानमन्त्री केपी शर्मा ओली आगामी मंसिर १७ गते छिमेकी मुलुक चीन जाँदैछन् । प्रधानमन्त्री ओलीसहित एमाले नेताहरु जुनसुकै हालतमा पनि बीआरआई परियोजना स्वीकार गर्नुपर्ने मतमा छन् ।

कांग्रेसले भने बीआरआई ऋणमा लिन नसकिने बताउँदै आएको छ । देशले अहिले भइरहेको भन्दै धेरै ऋणको भार थेग्न सकिने भन्दै बीआरआई अनुदानमा मात्रै स्वीकार गर्न सकिने कांग्रेसको अडान छ । प्रधानमन्त्री ओलीको चीन भ्रमण पनि अझैं अन्यौलमा रहेको ती मन्त्रीले बताए ।

सत्तारुढ दलमा सुरु भएको खटपटले प्रधानमन्त्री ओलीको चीन भ्रमण र बीआरआई सरकार परिवर्तनको प्रस्थान विन्दु बन्नसक्ने आँकलनसमेत राजनीतिक बृत्तमा सुरु भएको छ ।