सरकारको निर्णयले कांग्रेसकै पूर्वसांसद खनाल आश्चर्यचकित

काठमाडौं, ४ माघ । मन्त्रिपरिषद्ले रुपन्देहीलाई राजधानी तोकेपछि नेपाली कांग्रेसकै नेता तथा तत्कालीन दाङ– ३ बाट निर्वाचित पूर्वसभासद् राजु खनालले आश्चर्य व्यक्त गरेका छन् । रुपन्देहीलाई राजधानी तोक्नुलाई दुर्भाग्यपूर्ण भन्दै खनालले देशभर जारी आन्दोलन र दाङवासीको आन्दोलनमा आफ्नो ऐक्यवद्धता रहेको जनाएका छन् ।

विज्ञप्तिको पूर्णपाठ :

सम्पूर्णरुपमा पाँच नम्बर प्रदेशको राजधानीको रुपमा दाङ उपयुक्त हुँदाहुँदै पनि सबै प्रतिवेदनहरुले दाङलाई प्रादेशिक राजधानीको रुपमा प्रस्ताव गरिरहँदा मन्त्रिपरिषदको पछिल्लो निर्णयले आश्चर्यचकित तुल्याएको छ । सम्पूर्ण पक्षले मानसिक रुपमा दाङलाई स्वीकार गरिसकेको अवस्थामा एक्कासी मन्त्रिपरिषदको बैठकले रुपन्देहीलाई मुकाम तोक्नु दुर्भाग्यपूर्ण छ । म त्यो निर्णय सच्याउन सरकारसंग जोडदार रुपमा माग गर्दछु ।

विगतको निर्वाचनमा दाङलाई प्रादेशिक राजधानी बनाउने प्रस्ताव सर्वपक्षीय थियो, र हामी सबैले दाङलाई राजधानी बनाउने विश्वास आम जनसमुदायमा दिलाएका थियौँ । त्यसैले जनताको त्यो विश्वासलाई मूर्तरुप दिने जिम्मेवारी नवनिर्वाचित जनप्रतिनिधिको काँधमा आएको छ । दाङबाट निर्वाचित जनप्रतिनिधिहरु त्यो अजेण्डाबाट पछि हट्नुहुने छैन भन्ने मेरो विश्वास छ । जनप्रतिनिधिहरुले त्यो अजेण्डा अघि सारेमा जुनसुकै तरहबाट पनि त्यसलाई सहयोग गर्ने प्रतिवद्धता व्यक्त गर्दछु ।

सरकारको पछिल्लो निर्णय बिरुद्ध दाङ लगायतको क्षेत्रमा जुन आन्दोलन उठेको छ ,त्यो स्वागतयोग्य छ । अन्यायका बिरुद्ध नागरिकहरु आन्दोलित हुनु स्वाभाविकै हो । त्यो आन्दोलनप्रति पूर्ण समर्थन र ऐक्यवद्धता प्रकट गर्दछु । दाङबासीकै बीचमा रहेर आन्दोलन गर्ने चाहना हुँदाहुँदै पनि आमाको आसोचमा रहेका कारण म भौतिकरुपमा आन्दोलनमा सहभागी हुन सकेको छैन । तर म दाङको त्यो माग र अजेण्डाप्रति सदा समर्पित रहेको विश्वास दिलाउन चाहन्छु ।

राजु खनाल
संविधानसभा सदस्य– २०७०