सीमा क्षेत्रमा बढ्दै कुखुरा तस्करी : भारतीय सेतो अण्डामा कडाइ

चितवन ।सरकारले भारतसँगकाे खुला नाकाबाट जथाभावी कुखुराजन्य वस्तु अायातमा प्रतिबन्ध लगाए पनि तस्करी भने राेकिएकाे छैन । खुला सिमानाका कारण सीमावर्ती शहर हुँदै कुखुराको अण्डा भित्रिन थालेकापछि नेपाल अण्डा उत्पादक सङ्घले निगरानी बढाएको छ ।

सङ्घको केन्द्रीय समितिका पदाधिकारी एवं सदस्यहरुले नियमित रुपमा त्यस्ता बजारको अनुगमन गरी अवैध रुपमा अण्डा भित्रन नदिन सचेत गराएका छन् । सीमा क्षेत्रका बजारमा भारतीय सेतो अण्डा भित्रिएपछि नेपाली उत्पादन प्रभावित बनेको सङ्घका केन्द्रीय अध्यक्ष त्रिलोचन कँडेलले जानकारी दिए ।

सरकारले अनुसार  कानूनी रुपमा हवाईमार्गबाहेक अन्यत्र नाकाबाट कुखुराजन्य पदार्थ आयात गर्न निषेध गरेकाे भए पनि भारतबाट हुने लुकीछिपी अण्डा भित्र्याउने क्रम नराेकिएकाे कँडेलले बताए ।

केन्द्रीय समितिले अवैध अण्डा अायातमा नियमित अनुगमन गरिरहेको उनकाे भनाइ छ । सशस्त्र प्रहरीको सीमा सुरक्षा बलका अधिकारीलाई भेट गरी अण्डा भित्रन नदिन समितिले आग्रह समेत गरेको छ ।

नेपाल अण्डा उत्पादक सङ्घका केन्द्रीय सचिव मदन पोखरेलका अनुसार बर्दघाट, भैरहवा, परासी, महेशपुर, वीरगञ्ज, जनकपुर, सिराहालगायत क्षेत्रमा नियमित अनुगमन भइरहेको छ । देशका अन्य सीमा क्षेत्रका बजारमा पनि भारतीय अण्डा भित्रन नदिन सम्बन्धित क्षेत्रका सशस्त्र प्रहरी, व्यवसायी र कृषकलाई आग्रह गरिएको कँडले बताए ।

दैनिक ३५ लाख अण्डा उत्पादन

नेपालमा हाल प्रतिक्रेट रु ३६५ सम्म पुगेको अण्डाको फार्म मूल्य घटेर रु २७० मा कारोबार भइरहेको छ । दुई वर्षअघि अण्डाको प्रतिक्रेट मूल्य रु ३६५ रहेको थियो ।

हाल देशभरमा देशभरिका २ हजार १०० खोरमा कुखुरा पालिँदै आएको छ भने दैनिक ३५ लाख अण्डा उत्पादन हुन्छ । जसमध्ये आधा चितवनमा मात्रै उत्पादन हुँदै आएको छ ।

कुखुरापालनबाट राेजगारी पनि बढेकाे छ । हाल एक लाख ७० हजारभन्दा बढी मजदूर लेयर्स कुखुरापालनमा कार्यरत रहेका छन् ।