पहिलो संयुक्त चुनावीसभामै दाहाल अनुपस्थित ?

नेकपा एमालेका अध्यक्ष केपी शर्मा ओलीले आइतबार ताप्लेजुङबाट पहिलो चरणको संयुक्त चुनाव अभियान शुरु गर्ने भएका छन्।

नेकपा माओवादी केन्द्रसँग चुनावी गठबन्धनपछि दुवै दलका अध्यक्षहरुले संयुक्त रुपमा कार्यक्रम शुरु गर्ने भनिएको थियो । तर माओवादी केन्द्रका अध्यक्ष पुष्पकमल दाहाल प्रचण्ड आइतबार पनि ताप्लेजुङ नगै आफ्नो चुनावी क्षेत्रमै सक्रिय हुने उनका स्वकीय सचिव प्रकाश दाहालले बताएका छन्। ‘आइतबारका लागि आफ्नै निर्वाचन क्षेत्रमा विभिन्न कार्यक्रमहरु हुने छन् । ताप्लेजुङको कार्यक्रममा जान नभ्याउनु हुने भो’ दाहालले भने ।

पार्टी एकताको विषयमा ओली र दाहालले तल्लो कमिटीहरुलाई जारी गरेको संयुक्त विशेष निर्देशनमा पहिलो चरणको चुनावमा कार्तिक १९ देखि २६ गतेसम्म आयोजना गरिने अभियानमा दुवै अध्यक्षहरुले सम्बोधन गर्ने उल्लेख थियो। सदरमुकाम फुङ्लिङमा आयोजना हुने कार्यक्रममा दुवै अध्यक्ष सहभागी हुने भनेर जिल्लाभर प्रचार गरिएको छ ।

प्रतिनिधिसभाको एक र प्रदेशसभाको दुई निर्वाचन क्षेत्र रहेको ताप्लेजुङमा माओवादीको भागमा प्रदेशसभाको परेको छ । प्रतिनिधिसभामा एमाले सचिव तथा प्रचार विभागका प्रमुख योगेश भट्टराई उम्मेदवार रहेका छन् ।

ताप्लेजुङमा हुँदा ओली एमालेका पूर्व महासचिव मदन भण्डारीको जन्मथलो ढुंगेसाँघु पनि जाने कार्यक्रम रहेको छ।