आज मौद्रिक नीति ल्याउँदै केन्द्रीय बैंक

काठमाडौं। नेपाल राष्ट्र बैंकले आज चालू आर्थिक वर्षको मौद्रिक नीति ल्याउने तयारी गरेको छ । बिहीबार प्रधानमन्त्रीलाई मौद्रिक नीतिका सम्बन्धमा ब्रिफिङ गरिसकेको र अहिले बिहान बस्ने बोर्ड बैठकले मौद्रिक नीति ल्याउने कि रोक्ने भन्ने निर्णय गर्ने राष्ट्र बैंकका प्रवक्ता गुणाकार भट्टले बताए ।

नेपाल राष्ट्र बैंकका गभर्नर महाप्रसाद अधिकारीले प्रधानमन्त्री शेरबहादुर देउवालाई बिहीबार मौद्रिक नीतिको ब्रिफिङ गरेका थिए। बिहीबार साँझ प्रधानमन्त्रीसमक्ष मौद्रिक नीतिको ब्रिफ गरेका कारण अब नीति ल्याउन शुक्रबार बिहान सञ्चालक समितिको बैठक बोलाएको राष्ट्र बैंकले जनाएको छ।

बुधबार र बिहीबार बिहान मौद्रिक नीतिबारे गभर्नरले बिफ्र गर्ने तयारी गरिए पनि प्रधानमन्त्रीको समय अभावका कारण बिहीबार साँझ मात्र ब्रिफिङ गरिएको थियो। जनार्दन शर्माले अर्थमन्त्रीबाट राजीनामा दिएपछि प्रधानमन्त्री देउवाले नै अहिले अर्थ मन्त्रालयको जिम्मा लिएका कारण सिधै प्रधानमन्त्रीलाई ब्रिफिङ गरिएको हो।

आर्थिक अनुसन्धान विभागले अन्य विभागसँग छलफल गरी तयार पारेको मस्यौदाउपर छलफल सकेर ड्राफ्ट तयार पार्ने र सो ड्राफ्ट राष्ट्र बैकको बोर्ड बैठकमा छलफल हुने बताइएको छ।

बोर्ड बैठकले स्वीकृत गरेपछि गभर्नरले आगामी वर्षको मौद्रिक नीति सार्वजनिक गर्ने व्यवस्था छ । तर, बोर्ड बैंठकमा सहमति नजुटे पुनः अर्को पटक बैठक बस्दै जान्छन् । राष्ट्र बैकका अनुसार बोर्ड बैठकमा एक पटकमा सहमति नभए दोस्रो, तेस्रो बैठक बस्दै जान्छ, विगतमा तीनचार पटकसम्म पनि बोर्ड बैठक बस्ने परम्परा रहेको छ । स्वीकृत नभएसम्म छलफल भइरहन्छ । बोर्ड बैठकले बिहान स्वीकृत गरेमा शुक्रबार बेलुका मौद्रिक नीति सार्वजनिक गर्ने योजनामा राष्ट्र बैंक रहेको छ ।

(