कांग्रेस बैठक एक साता लम्बिने, नेताहरु आलोचना र बचाउमा व्यस्त

काठमाडौं, १२ चैत्र । प्रमुख प्रतिपक्षी दल नेपाली कांग्रेसको केन्द्रिय कार्यसमिति बैठक अझै एक साता लम्बिने निश्चित भएको छ । पार्टीले निर्वाचनमा व्यहोरेको पराजयको बारेमा समिक्षा गर्न बसेको बैठकमा शीर्ष नेताहरु नै एक आपसमा आरोप–प्रत्यारोपमा उत्रिएपछि बैठक मुल एजेण्डामा अझै पनि प्रवेश गर्न सकेको छैन।

स्रोतका अनुसार बैठक अझै साता लम्बिने छाँटकाँट छ । एक नेताले भने,‘आलोचना र बचाउ हुने काम भएको छ । आलोचना र प्रशंसाको पोको मात्रै फुकेको छ । त्यसैले बैठक अझै लम्बिन्छ ।’ बैठकमा नेताहरुवीच मर्यादाक्रम (पोर्टफोलियो) लाई लिएर पनि दुई समूहबीच विवाद भएको छ ।

पार्टी सभापति समेत रहेका शेरबहादुर देउवा नेतृत्वको संस्थापन पक्षले मर्यादाक्रममा दोस्रो नम्बरमा गोपालमान श्रेष्ठलाई राखेपछि रामचन्द्र पौडेल समूहले कडा विरोध गरेको थियो । कार्यसमिति बैठकमा मर्यादाक्रमको विवाद अलिहे चुलिएको छ । कतिपयले त कांग्रेसमा खोई त चेत पलाएको भन्दै सहभागी नेताहरुले प्रश्न उठाएका छन ।