काठमाडौंबाट प्रधानमन्त्री भेटेर फर्केका निर्मलाका आमाबाले यसो भने…

उल्टाखाम (कञ्चनपुर) – निर्मला पन्तका आमा दुर्गादेवी र बुवा यज्ञराज काठमाडाैंमा प्रधानमन्त्री, गृहमन्त्री र प्रहरी महानिरीक्षकलाई भेटर छोरीले न्याय पाउने झिनो आशाका साथ एक सातापछि घर फर्किएका छन् । पन्त दम्पती भीमदत्त नगरपालिका–२ उल्टाखामस्थित घरमा सोमबार साँझ आइपुगेका हुन्।

यज्ञराजले प्रधानमन्त्रीले जुनसुकै हालतमा पनि निर्मलाका हत्यारा पत्ता लगाएर कारबाही गर्ने आश्वासन दिएकाले न्याय पाउनेमा आशा जागेको बताए ।‘प्रधानमन्त्रीले निर्मलाको म पनि अभिभावक हुँ । दुई महिना भनेको धेरै ढिलो होइन, जसरी पनि दोषीलाई पत्ता लगाएरै छाड्छु भनेर हामीलाई आश्वासन दिनुभएको छ’, उनले भने, ‘प्रधानमन्त्रीको आश्वासनले अलि आशा जागेको छ।’

देशको प्रधानमन्त्रीले जसरी पनि दोषी पत्ता लगाएर न्याय दिलाउँछु भनेकाले छोरीले न्याय पाउने आशा बोकेर घर फर्केको उनी बताउँछन् । सुरुदेखि विश्वास टुटेकाले छोरीले न्याय पाउनेमा पूर्ण विश्वास भने हुन नसेको उनी बताउँछन्। ‘सुरुबाटै हाम्रो विश्वास टुटेको छ । देशको प्रधानमन्त्रीले भनिसकेपछि अलिक आशा त पलाएको छ तर अझै पनि छोरीले न्याय पाउनेमा पूरै विश्वस्त हुन सकेका छैनौं’, उनले भने । प्रधानमन्त्री केपी ओली, गृहमन्त्री रामबहादुर थापा र प्रहरी महानिरीक्षक सर्वेन्द्र खनाललाई भेटेर आफ्ना व्यथा सुनाउन पाउँदा मन हलुको भएको उनीहरू बताउँछन्।

आजको नागरिक दैनिकमा खबर छ ।

(Xanax)