किन बोलाए राजपाका शीर्ष नेतालाई प्रधानमन्त्रीले सिंहदरबार ?

काठमाडौं । माग पूरा नभई चुनावमा नजाने अडान लिँदै आएका राष्ट्रिय जनता पार्टीका शीर्ष नेतालाई प्रधानमन्त्री शेरबहादुर देउवाले वार्ताका लागि बोलाएका छन् ।

सिंहदरबारस्थित प्रधानमन्त्री कार्यालयमा देउवाले साढे ११ बजेका लागि राजपा नेताहरुलाई छलफलमा बोलाएका हुन् ।

राजपाले संविधान संशोधन नभई स्थानीय तहको दोस्रो चरणको चुनावमा पनि भाग नलिने चेतावनी दिँदै आइरहेको छ । देउवाले राजपा नेताहरुलाई चुनावमा जाने वातावरण बनाउने आश्वासन दिइसकेका छन ।

संविधान संशोधन भने स्थानीय चुनावपछि मात्र हुने उनले शुक्रबारै संसद बैठकलाई सम्बोधन गर्ने क्रममा प्रष्ट पारिसकेका छन् । चुनावपछि प्रमुख प्रतिपक्षी नेकपा एमालेको समेत समर्थन लिएर संविधान संशोधन गर्ने आश्वासन देउवाले दिएका छन् ।

केही दिनअघिसम्म दोस्रो चरणको निर्वाचनपछि संविधान संशोधनको प्रक्रिया सुरु गर्न सहमत रहेको राजपाले फेरि पुरानै मागमा अडान राख्न थालेको हो ।

दोस्रो चरणको निर्वाचनपछि संविधान संशोधन गर्ने सहमतिका आधारमा राजपा प्रधानमन्त्री निर्वाचनमा शेरबहादुर देउवालाई मतदान गर्न आएको थियो । तर, उसले शुक्रबारबाट एक्कासि संशोधनलाई न्यूनतम अडानका रूपमा लिन थालेको हो ।

राजपाले भन्दै आएको मुद्दा फिर्ता, शहीद घोषणालगायतका काम सरकारले गरिरहेको र बाँकी काम पनि चुनावअघि नै गर्ने देउवाले बताएका छन् । राजपालाई चुनावमा आउन प्राविधिक समस्या समाधानकै लागि संसदले स्थानीय तह निर्वाचन ऐनमा संशोधन गरिसकेको छ ।