केही तत्वले जनतामा निराशा छर्न खोजेका छन् : प्रधानमन्त्री ओली

काठमाडौं । प्रधानमन्त्री केपी शर्मा ओलीले देशमा उद्योगको स्थापना मार्फत रोजगारी सृजना गर्नुपर्ने बताउनुभएको छ ।

सार्क चेम्बर अफ कमर्सको प्रतिनिधि मण्डलसँग भेट गर्दै प्रधानमन्त्री ओलीले उद्योगको स्थापना मार्फत गरिबी र पछौटेपन हटाउनुपर्ने बताउनुभयो । “यो अभियान हामीले नेपाल मात्र होइन दक्षिण एशियामा नै सञ्चालन गर्नुपर्छ” प्रधानमन्त्री ओलीले भन्नुभयो “गरिबी र पछौटेपनबाट अब दक्षिण एशियालाई नै मुक्त गर्नुपर्दछ ।”

केही तत्वहरुले जनतामा निराशा छर्न खोजेको प्रधानमन्त्री ओलीको भनाइ छ । निराश जनता देशको लागि सबभन्दा खतरनाक हुने भन्दै प्रधानमन्त्री ओलीले “आम जनतामा आत्मविश्वास बढाउनु र आसलाग्दो भविष्य देखाइदिनु सरकारको काम हो ।”

देश विकासका लागि अहिले उपयुक्त समय भएकोले यसलाई सदुपयोग गर्नुपर्ने प्रधानमन्त्री ओलीको भनाइ छ । “देशको जनसंख्यामा काम गर्न सक्नेहरुको बाहुल्यताको अवस्था छ ” प्रधानमन्त्री ओलीले भन्नुभयो “यो जनशक्तिलाई उपयोग गरेर देश निर्माणको काम गर्नुपर्छ ।”
प्रधानमन्त्री ओलीले अब स्थापना हुने उद्योगहरु प्रविधि मैत्री हुनुपर्ने बताउनुभयो । उहाँले उद्योगमा काम गर्ने मजदुरहरु पनि प्रविधिमा पोख्त हुनुपर्ने बताउनुभएको छ ।

प्रधानमन्त्री ओलीले विश्व समुदायलार्ई नेपालमा लगानी मैत्री वातावरण भएको कुरा प्रचार गर्न नेपाली उद्यमीहरुलाई आग्रह गर्नुभएको छ ।