चिठ्ठा परेको भन्दै लाखौं लुट्दै गिरोह

माधव बेल्वासे

कपिलवस्तु माघ ३ । कतै तपाइलाई सामाजिक सञ्जालबाट लाखौंको चिठ्ठा पर्यो भन्दै ठगी गरिरहेका त छैनन् । होसियार हुनुहोस् ! पछिल्लो समयमा यस्ता घटनाहरु बढिरहेका छन । सामाजिक सञ्जालमार्फत तपाईलाई चिट्ठा परेको छ करको लागि केहि रकम पठाउनुहोस् भन्दै लाखौं लुटिरहेको खुल्न आएको छ । कपिलवस्तुमा यस्ता कार्य गर्ने दुई जनालाई प्रहरीले पक्राउ गरेको छ । कपिलवस्तुको कृष्णनगरबाट एक जना नेपाली नागरिक र चन्द्रौटाबाट एक जना भारतीय नागरीक अहिले प्रहरीको नियन्त्रणमा रहेका छन ।

समाजिक सञ्जाल भाइबर तथा इमोबाट ठगी गर्ने भारतको गोरखपुर थाना शाहपुर कौवाबाघ आरपीएफ कलोनी क्वार नं. ३९ डी.सी. बस्ने २८ वर्षीय अजित कुमार सिंह रहेका छन । पक्राउ परेका भारतीय नागरिक सिंहको साथबाट प्रहरीले ५५ हजार रुपैयाँ, नक्कली कागजपत्र बरामद गरेको जनाइएको छ ।

सुनसरी जिल्ला धरान उपमहानगरपालिका ८ का २८ वर्षीय सरोज रानामगरलाई २५ लाख चिठ्ठा परेको प्रलोभनमा पारी करबापत ५५ हजार बैंकमा जम्मा गर्न लगाई भारतीय गिरोहले ठगी गरेको आरोप उनलाई लगाइएको छ । सरोजले ग्लोबल आईएमई बैंक धरानबाट अजित कुमार सिंहको नाममा ५५ हजार पठाएका थिए । ईन्टरनेट भाइबरमा बिजय कुमार नामका अपरिचित व्यक्तिले पीडित सरोजलाई २५ लाख चिठ्ठा परेको प्रलोभन देखाई करबापत पहिलो किस्तामा ५५ हजार बैंकमा जम्मा गर्न लगाइएको प्रहरीले जनाएको छ ।

त्यस्तै कृष्णनगर नगरपालिका वडा नं. ३, झण्डिनगरका ३३ वर्षीय सन्तोष कुमार गुप्ता बानियालाई प्रहरीले कृष्णनगरमा रहेको सिद्धार्थ बैंक लिमिटेडबाट पक्राउ गरेको हो ।

विभिन्न व्यक्तिलाई फोन गरी तपाईंले चलाएको भाइबर, फेसबुक, ट्विटर तथा सिम कार्डबापत ४० लाख रुपैयाँ लट्री जित्नुभएको छ भनी फोन तथा म्यासेज गरी उनले प्रलोभनमा पार्ने गरेका थिए ।

लट्री बापतको कर नेपाल सरकारलाई जम्मा गरे पछिमात्र उक्त रकम तपाईंको खातामा जम्मा हुने बताई आइएमई तथा विभिन्न बैंकमार्फत पैसा पठाउन लगाई उनले ठगी गरेको प्रहरीले जनाएको छ ।

जिल्ला प्रहरी कार्यालय कपिलवस्तुका प्रहरी निरीक्षक केशव ज्ञवालीको नेतृत्वमा खटिएको प्रहरी टोलीले कृष्णनगरबाट पक्राउ गरेको हो । प्रलोभनमा फसेका व्यक्तिहरुलाई विभिन्न मनी ट्रान्सफरहरु र बैंकमार्फत रकम जम्मा गर्ने र ठगी गर्दै आएको कपिलवस्तु प्रहरीले जनाएको छ । उनले स्याङजाको गल्याङ नगरपालिका वडा नम्बर ३, गल्याङ बस्ने बर्ष २३ की प्रेना थापालाई चिठ्ठा परेको भन्दै आफ्नो नाममा २५ हजार आइएमई गर्न लगाएका थिए ।

पैसा पठाउन दबाब दिएपछि थापाले जिल्ला प्रहरी कार्यालयमा मौखिक उजुरी दिएकी थिइन् । पक्राउ परेका गुप्ताले जिल्लाका अन्य व्यक्तिहरुबाट ४ लाख ६८ हजार रकम ठगी गरि सकेको प्रहरीले बताएको छ । गुप्ता पक्राउ परेको दिन सोही बैंकबाट उनले मोहन बहादुर बस्नेतले सन्तोषको नाममा आइएमई गरि पठाएको एक लाख ४० हजार रकम समेत निकालिएको थियो ।

चिठ्ठा पर्यो भन्दै ठगि गर्ने हरुले नक्कली नेपालको झण्डा सहितको प्रमाण पत्र बनाइ ठग्ने गरेको पाइएको छ । पछिल्लो समय नेपालमा धेरै मानिस यस्ता भारतीयहरुबाट ठगिरहेकोले यस्ता हल्लाको पछि नलाग्न वडा प्रहरी कार्यलय चन्द्रौटाका प्रहरी निरिक्षक झविन्द्र भट्टराइले आग्रह गरे ।

प्रहरीले आरोपीलाई मंगलबार पत्रकार सम्मेलन गरी सार्वजनिक गरेको छ । प्रहरी निरीक्षक भट्टराईले नेपालको कानुनमा चिठ्ठा वा उपहार परेमा कर कट्टा गरी बाँकी चिठ्ठा परेकालाई उपलब्ध गराइने व्यवस्था रहेको बताए । उनले यदि कसैले चिठ्ठा परेको प्रलोभन देखाई कर जम्मा गर्न लगाएमा सतर्क हुन आग्रह गरे । पत्रकार सम्मेलनमा शिवराज नगरपालिकाका नगरप्रमुख नेत्रराज अधिकारी, इलाका प्रशासन कार्यालय प्रमुख जगदीश अर्यालको उपस्थिति रहेको थियो ।

तस्विर नम्बर १ भारतको गोरखपुर थाना शाहपुर कौवाबाघ आरपीएफ कलोनी क्वार नं. ३९ डी.सी. बस्ने २८ वर्षीय अजित कुमार सिंह प्रहरीको नियन्त्रणमा ।

तस्विर नम्बर २ सुनसरी जिल्ला धरान उपमहानगरपालिका ८ का २८ वर्षीय सरोज रानामगरलाई २५ लाख चिठ्ठा परेको भन्दै नक्कली चेक ।