नयाँवर्ष कपमा २० टीमले खेल्दै, पहिलोपटक इन्द्रेणी संघले उतार्ने भयो खेलाडी

ड्यालस, २५ चैत (टेक्सस) । नेपाली नयाँ वर्षको अवसरमा ड्यालसमा हुन लागेको नयाँ वर्ष कप फुटबल प्रतियोगितामा पहिलोपल्ट इन्द्रेणी साँस्कृतिक टीमले समेत सहभागिता जनाउने भएको छ ।
आइतबार हुन लागेको प्रतियोगितामा २० वटा टीमले सहभागिता जनाउँदैछन् । ड्यालसको ग्रेपभाइनमा हुने प्रतियोगितामा लामो समयदेखि साँस्कृतिक क्षेत्रमा क्रियाशील इन्द्रेणीले फुटबल प्रतियोगितामा सहभागिता जनाउन लागेको हो ।

ड्यालसको डिएफडब्लु हिमालयज फुटबल क्लबले प्रतियोगिता आयोजना गर्न लागेको हो । क्लबले हरेक वर्ष नेपाली नयाँ वर्षको अवसरमा प्रतियोगिता गर्दै आएको छ । क्लबले आयोजना गरेको यो तेस्रो पटक हो । “खेलाडीहरूलाइ पनि समेटेर अघि बढ्ने नीतिअनुसार पहिलोपल्ट फुटबल प्रतियोगितामा टीम समेत खडा गरेर सहभागिता जनाउन लागेका हौं”, इन्द्रेणीका अध्यक्ष ताराप्रसाद भुसालले भने । इन्द्रेणीले यसअघि दशैँ, तिहार, तीज, नयाँवर्ष लगायतका साँस्कृतिक कार्यक्रम गरेर नेपाली समुदायलाई समेट्दै आएको छ ।

इन्द्रेणी साँस्कृतिक संघको टीमको सम्पूर्ण तयारी पूरा भएको व्यबस्थापक सोफिन थापाले बताए । टीमको कप्तानी रूपक खड्काले सम्हाल्ने भएका छन् । इन्द्रेणी साँस्कृतिक संघकी संस्थापक तथा प्रवासी नेपाली मञ्चकी उपाध्यक्ष यमुना भट्टराईले खेलाडीहरूको विकास गर्ने र उनीहरूलाइ प्रोत्साहन दिने उद्देश्यले टीम दर्ता गरेर सहभागिता जनाउन लागेको हो ।

प्रतियोगितामा पहिलो हुने टीमले ट्रफीसहित नगद पुरस्कार समेत पाउनेछन् । पहिलो हुने टीमले ट्रफी सहित नगद १ हजार ५ सय डलर नगद र दोस्रो हुने टीमले ७ सय डलर पुरस्कार पाउनेछन् । त्यस्तै उत्कृष्ट खेलाडीलाई समेत पुरस्कारको व्यबस्था गरिएको आयोजकले जनाएका छन् । यसपटकको प्रतियोगितामा ड्यालसका अतिरिक्त लुजियाना, ओक्लाहोमा र लसएन्जलसका टीमहरू पनि सहभागी हुँदैछन् ।