प्रचण्डलाई अध्यक्ष स्वीकार नगरे एमालेलाई यादवको यस्तो धम्की

काठमाडौं । नेकपा माओवादी केन्द्रका नेता एवं पूर्वमन्त्री उमेश यादवले प्रचण्डलाई एकीकृत पार्टीको अध्यक्ष नदिए एमालेसँगको ‘पार्टी एकता र सरकार गठनको कोर्ष नै क्लोज’ हुने चेतावनी दिएका छन् ।

एमालेले सरकारको नेतृत्व गर्दा माओवादीले एकीकृत पार्टीको नेतृत्व पाउनुपर्ने यादवको जिकिर छ । उनले त्यसो हुन नसके ‘पार्टी एकता र सरकार गठनको कोर्ष नै क्लोज’ हुने बताए ।

एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ बीच लामो गोप्य छलफल भएको थियो । छलफलमा विशेष गरी पार्टीको राजनीतिक, वैचारिक, संगठनात्मक र विभिन्न पद वाँडफाँडमा कुरा भएको बताइएको छ ।

सबैभन्दा महत्वपूर्ण विषय एकीकृत पार्टीको नेतृत्व कसले गर्ने र पद बाडफाडका विषयमा छलफल केन्द्रित रहको बताइएको छ ।

माओवादीले एमालेलाई प्रधानमन्त्री पद दिन तयार भएको तर विशेषगरी एमाले ओली समूहले माओवादीलाई एकीकृत पार्टीको अध्यक्ष स्वीकार गर्न नसक्दा पार्टी एकता प्रक्रियाले गति लिन सकेको छैन ।