मस्कट (ओमन), ११ असोज ः ओमनको तीनदिने औपचारिक भ्रमणमा रहनुभएका प्रधानमन्त्री शेरबहादुर देउवाले यहाँका प्रसिद्ध ऐतिहासिक दरबार र किल्लाको आज अवलोकन गर्नुभयो ।
प्रधानमन्त्री देउवाले ओमनको राजधानी मस्कटबाट १२० किलोमिटर टाढा रहेको सयौँ वर्ष पुराना निजवाको निजवा सौक किल्ला र बहलामा रहेको इमाम राजाको ऐतिहासिक जब्रिन दरबारको अवलोकन गर्नुभयो ।
अवलोकनका क्रममा यहाँका उच्च सरकारी अधिकारीले प्रधानमन्त्री देउवालाई सो क्षेत्रको ऐतिहासिक महत्वका बारेमा जानकारी गराउनुभएको थियो । प्रधानमन्त्री देउवाका साथ उपप्रधानमन्त्री एवं परराष्ट्रमन्त्री कृष्णबहादुर महरा, श्रम तथा रोजगारमन्त्री फरमुल्ला मंसुर, महिला, बालबालिका तथा समाज कल्याण मन्त्री आशा कोइरालालगायत हुनुहुन्थ्यो ।
प्रधानमन्त्री देउवाले यसअघि मस्कटमा उच्चस्तरीय भेटघाट गर्नुका साथै ग्राण्ड सुल्तान मस्जिद, राष्ट्रिय संग्रहालय, रोयल ओपेरा हाउसको समेत अवलोकन गर्नुभएको थियो । प्रधानमन्त्री देउवा संयुक्त राष्ट्रसंघको ७२औँ महासभामा भाग लिई स्वदेश फर्कने क्रममा संयुक्त अरब इमिरेट्स (युएइ) को अबुधावी हुँदै यहाँ आइपुग्नुभएको हो ।
प्रधानमन्त्रीको नेपाली समुदायसँग अन्तक्र्रिया
प्रधानमन्त्री देउवाले वैदेशिक रोजगारमा रहेका नेपालीले पठाएको विप्रेषणले मुुलुकको अर्थतन्त्रमा ठूलो टेवा पु¥याएको बताउनुभएको छ ।
ओमनस्थित नेपाली दूतावासको आयोजनामा भएको नेपाली समुदायसँगको अन्तक्र्रिया कार्यक्रममा प्रधानमन्त्री देउवाले उचित कानूनको व्यवस्था गरी वैदेशिक रोजगारलाई भरपर्दाे, मर्यादित र सुरक्षित बनाउने प्रतिबद्धता व्यक्त गर्नुभयो ।
प्रधानमन्त्री देउवाले संविधान जारी भई सबै निर्वाचन सम्पन्न भएपछि मुलुक समृद्धिको बाटोमा अघि बढ्ने विश्वास व्यक्त गर्दै नेपाली जहाँ भए पनि नेपाललाई बिर्सन नहुनेमा जोड दिनुभयो ।
कार्यक्रममा श्रम तथा रोजगारमन्त्री फरमुल्ला मंसुरले वैदेशिक रोजगारमा देखिएका विकृति अन्त्य गरी यस व्यवसायलाई मर्यादित र व्यवस्थित बनाउन आफू लागिपरेको जानकारी गराउनुभयो ।
महिला, बालबालिका तथा समाजकल्याणमन्त्री आशा कोइरालाले मुलुकको समृद्धिका लागि सबैले आफ्नो स्थानबाट इमान्दारिताका साथ काम गर्नुपर्ने बताउनुभयो ।
राजदूत शर्मिला पराजुली ढकालले प्रधानमन्त्री देउवाको ओमन भ्रमणले दुई देशबीचको सम्बन्ध थप उचाइमा पुगेको बताउँदै यस क्षेत्रमा कार्यरत पीडित नेपाली कामदारलाई न्याय दिलाउन आफूले हरसम्भव प्रयास गरिरहेको जानकारी गराउनुभयो ।
प्रतिक्रिया