भोजपुरमा माओवादी केन्द्रका कार्याकर्ताद्वारा एमालेका उम्मेदवार कुटिए

भोजपुर, असार १२ – भोजपुरको दक्षिणी रामप्रसाद राई गाउँपालिका–८ वासिखोरामा एमालेका वडाध्यक्षका उम्मेदवारलाई माओवादी केन्द्रका कार्यकर्ताले कुटपिट गरेका छन् । माओवादी केन्द्रका सञ्जोक राईको समूहले बासीखोराका वडाध्यक्ष पदका उम्मेदवार पाँचकुमार राईलाई आइतबार राति कुटपिट गरेको हो ।  एमालेको चुनावी सभाबाट फर्कने क्रममा वडाध्यक्षका उम्मेदवार राईलाई रक्सी खाएका वाइसिएल कार्यकर्ता राईसहित ११ जनाको समूहले कुटपिट गरेको स्थानीय बासिन्दाले बताएका छन् । कुटपिटका कारण वडाध्यक्ष उम्मेदवार राई सामान्य घाइते भएको एमाले जिल्ला कमिटी सचिव शरणकुमार राईले बताउनुभयो । माओवादी केन्द्रका जिल्ला कमिटी सहइन्चार्ज टिकाराम प्रधानले चुनाव प्रचारप्रसारका क्रममा झगडा भएको स्वीकार्नुभएको छ । उहाँले थप जानकारी भने आइनसकेको बताउनुभयो ।  कुटपिटमा संलग्न सञ्जोग राईसहितको समूहलाई पक्राउ गरिएको भोजपुरका प्रहरी नायव उपरीक्षक काजीकुमार आचार्यले बताउनुभयो । पक्राउ परेकाहरु बिरामी भएकाले उपचारका लागि छाडिएको आचार्यले जानकारी दिनुभयो ।  सञ्जोक राई यसभन्दा अघि ओख्रेको साइलम जंगलमा शिक्षकको पैसा लुटेको आरोपमा प्रहरीको फरार सूचिमा रहेका व्यक्ति हुन् ।