रोनाल्डो ‘गोल मेसिन’मा लागेको खिया

लिगका तीन खेल, गोल गर्ने २३ वटा राम्रा मौका तर गोल शून्य ।

यो आँकडा स्टार स्ट्राइकर क्रिष्टियानो रोनाल्डोको हो । युरोपियन च्याम्पियन रियल मड्रिडमा ९ वर्षको बसाईपछि रोनाल्डो यो सिजन इटालियन च्याम्पियन युभेन्टस गए । ३३ वर्षका रोनाल्डोलाई युभेन्टसले ११२ मिलियन युरो तिरेर भित्र्याएको हो । रोनाल्डो आएपछि युभेन्टसको उत्साह सबैतिर बढेको छ ।

सामाजिक सञ्जालमा उसको फ्यान फलोइङ्ग तीब्र गतिमा बढेको छ । जर्सीको कारोबार उच्च भएको छ । तर रोनाल्डोका लागि भने युभेन्टसको यात्रा अहिलेसम्म उत्साहप्रद हुन सकेको छैन । न उनका फ्यानहरुका लागि नै ।औपचारिक प्रतिस्पर्धामा रोनाल्डोले सिरी ए बाट युभेन्टसमा डेब्यु गरे । तीन खेल भइसक्यो तर रोनाल्डोको नाममा पहिलो सिरी ए गोल दर्ता भएको छैन ।

एउटा गोल गरेका थिए, त्यसले मान्यता पाएन । एउटा गोलका लागि सहयोग गरेका छन् । र पनि रोनाल्डोको नाममा गोल अहिलेसम्म लेखिएको छैन ।रोनाल्डोलाई गोल मेसिनको रुपमा लिइने गरिएको छ । तर रोनाल्डोको गोल मेसिनमा खिया लागेर भएको जाम अहिलेसम्म खुल्न सकेको छैन । रोनाल्डोले युभेन्टसबाट एक गोल गरेका छन्, त्यो परम्परागत खेलमा हो ।सिजन सुरु हुनुअघि युभेन्टस बी सँगको खेलमा उनले युभेन्टसका लागि पहिलो गोल गरेका थिए । तर त्यसपछि प्रतिस्पर्धात्मक खेलमा उनको प्रहारले जाली चुम्न सकेको छैन।

विश्वकप फुटबलमा चार गोल गरेका रोनाल्डोले त्यसपछि भने गोल गर्ने लय लिन सकेका छैनन् । सिरी ए अन्तर्गत शनिबार राति रोनाल्डोको नयाँ टिम युभेन्टस यो सिजन बढुवा भएको पार्मासँग खेलेको थियो ।पार्माको मैदानमा भएको खेलमा युभेन्टसले जित निकाल्यो । लगातार तेस्रो जितका साथ युभेन्टस लयमा छ । पक्कै पनि रोनाल्डोको उपस्थिति युभेन्टसको जितमा महत्वपूर्ण छ । तर रोनाल्डो आफैले प्रत्यक्ष रुपमा जितको माध्यम बन्ने मौका भने अझै पाएका छैनन् ।

गोलको यो खडेरीले रोनाल्डोलाई असर गरेको छ होला । त्यो भन्दा बढी रोनाल्डोको म्याजिकल गोल हेर्नका लागि पर्खेर बसेका युभेन्टस फ्यानहरुको भने मन उत्साहित हुन सकेको छैन ।उनीहरुले हरेक खेलमा टिमको जित त पक्कै चाहेका हुन्छन्, त्यो भन्दा बढी रोनाल्डोको गोल हेर्ने इच्छा छ । यो इच्छा पूरा हुन कम्तिमा अझै एक खेल पर्खिनु पर्ने भएको छ ।

अर्थात अन्तर्राष्ट्रिय प्रतिस्पर्धाका लागि अब लिग खेल केही समयको ब्रेक लाग्दैछ । रोनाल्डो अन्तर्राष्ट्रिय ब्रेकबाट फर्किएपछि चम्किने आश युभेन्टसीहरुमा छ ।युभेन्टसका प्रशिक्षक मासिमिलियानो अलेग्रीले सिरी ए मा फरक खालको समस्या झेलिरहेको बताए । उनले भने, ‘उनले यहाँ (सिरी ए) भिन्न खालको समस्या भोगिरहेका छन्, तर उनको ओभरअल खेल राम्रो रह्यो । अन्तर्राष्ट्रिय ब्रेकले उनलाई तिखार्ने आश छ ।’

रोनाल्डो विश्वको उत्कृष्ट खेलाडी रहेकाले जस्तोसुकै अवस्थामा गोल गर्न चाहनु स्वभाविक रहेको तर उनी शान्त रहनु पर्ने र त्यसपछि गोलको वर्षा हुने प्रशिक्षक अलेग्रीको भनाई छ ।