शेरबहादुर तामाङ मात्रै होइन आफ्नै बोलीले पद गुमाउने यस्ता छन् हस्तीहरु

काठमाडौं, ९ साउन । कानुन, न्याय तथा संसदीय मामिला मन्त्री शेरबहादुर तामाङले आफ्नै बोलीमा लगाम नहुँदा मंगलबार मन्त्री पदबाट राजीनामा दिएका छन् । गत ४ साउनमा चावहिलको एक विद्यालयमा गरेको भाषणले उनलाई विवादित बनाएपछि तामाङले मन्त्री पदबाट राजीनामा दिन वाध्य पारिएका हुन् ।

भाषणका क्रममा “बंगलादेशमा एमबीबीएस अध्ययन गर्ने नेपाली छात्राहरूले प्रमाणपत्र लिनका लागि शरीर सुम्पनु परेको” भन्ने अभिव्यक्ति उनी आफैलाई निकै महङ्गो सावित भयो । एक त कानुन, न्याय तथा संसदीय मामिला मन्त्री कुनै साइनोले पनि विद्यालयको कार्यक्रममा जानै हुँदैनथ्यो । गइहाले पनि मन्त्रीले तथ्य र प्रमाणबिना सुनेकै आधारमा भाषण ठोकेपछि उनले यो हाल ब्यहोर्नु परेको हो ।

मन्त्री तामाडको अभिव्यक्तिले महिलाको आत्मसम्मानमा गम्भीर चोट पुराएको भन्दै चारैतिर उनको तीब्र आलोचना भएको थियो । सामाजिक सञ्जालहरुमा समेत उनीमाथि सबै खनिएका थिए । मन्त्री भएको ४ महिना ८ दिनमा तामाङ मन्त्री पदबाट राजीनामा दिएर सिंहरदबारबाट बिदा भएका हुन् ।

विवादित बनेपछि पद गुमाउने मन्त्री शेरबहादुर तामाङ मात्रै होइनन् । यसअघि पनि थुप्रैले विवादमा तानिएपछि राजीनामा दिएका थिए । त्यस्ता पात्रहरुमा विशेषतः ऊर्जामन्त्री राधा ज्ञवाली, अर्थराज्यमन्त्री ल्यारक्याल लामा, बनमन्त्री मात्रिकाप्रसाद यादव, कृषिमन्त्री हरि पराजुली तथा रक्षामन्त्री शरदसिंह भण्डारी लगायतका हस्तीहरु छन् ।

राधा ज्ञवाली
एमाले नेतृ राधा ज्ञवाली ऊर्जामन्त्रीको पदमा रहँदा सोलु करिडोर प्रसारण लाइन निर्माणमा अनियमितता गरेको भन्दै तत्कालीन प्रधानमन्त्री सुशील कोइरालाले अख्तियारको आग्रहमा उनलाई पदबाट बर्खास्त गरेका थिए । १३२ केभी क्षमताको उक्त प्रसारण लाइन निर्माणमा ठेक्का प्रक्रिया पूरा नगरी अनियमितता गरेको आरोपमा ज्ञवालीलाई अख्तियार दुरुपयोग अनुसन्धान आयोगले १ असोज ०७२ मा कारबाही गर्न सिफारिस गरेको थियो । राधा ज्ञवाली हाल प्रतिनिधिसभाकी सांसद छिन् ।

ल्यारक्याल लामा
पहिलेदेखि नै विवादित छवि भएका ल्यारक्याल लामाको पद खोसिनुको पछाडि पनि अख्तियार दुरुपयोग अनुसन्धान आयोग थियो । दरबारमार्गस्थित इन्भेष्टमेन्ट बैंकको लकरमा अनुसन्धानका क्रममा अख्तियारले १४ थान गोली फेला पारेको थियो । उनीसँग दोहोरो नागरिकता भएको समेत खुलेको थियो । झलनाथ खनालको प्रधानमन्त्रीत्वकालमा अर्थराज्य मन्त्री रहेका लामासँग चीनको समेत नागरिकता रहेको सार्वजनिक भएको थियो । उनी माओवादी केन्द्रको तर्फबाट मन्त्री भएका थिए ।

हरि पराजुली
पदअनुसारको आचरण नगरी बहकिँदा पद गुमाउने मध्येका कृषिमन्त्री हरि पराजुली थिए । १५ असार २०७२ मा काठमाडौंको मुलपानीमा धान दिवसका अवसरमा रोपाई गर्न गएको बेला रोपाहार महिलासँग अश्लील व्यवहार गर्दै गरेको भिडियो र तस्बीर सार्वजनिक भएपछि उनको व्यापक आलोचना भयो र उनी मन्त्री पद त्याग्न बाध्य भएका थिए । सार्वजनिक कार्यक्रममा खैनी माडेर सेवन गर्दै थुकेको कुराले पनि उनको निकै आलोचना भएको थियो । तत्कालीन नेकपा (एमाले)बाट मन्त्री भएका उनी प्रधानमन्त्री सुशील कोइराला नेतृत्वको सरकारमा सहभागी थिए । आफूले अश्लील व्यवहार नगरेको दावी गरिरहँदा पनि प्रधानमन्त्री सुशील कोइरालाले उनलाई बर्खास्त गरेका थिए ।

दिलनाथ गिरी
प्रधानमन्त्री शेरबहादुर देउवा नेतृत्वको सरकारमा राप्रपाबाट शहरी विकासमन्त्री मन्त्री भएका थिए दिलनाथ गिरी । सोही सरकारमा उपप्रधानमन्त्रीको जिम्मेवारीमा रहेका आफ्ना पार्टी अध्यक्ष कमल थापासँग मनमुटाव बढेपछि मन्त्रिपरिषद बैठकमै थापाले गिरीलाई एक्कासी मन्त्री पदबाट राजीनामाको माग गरे । राजीनामा नदिएपछि उनलाई “मन्त्रीबाट फिर्ता बोलाउने” आशयको पत्र प्रधानमन्त्री देउवालाई थापाले थमाए । सोही पत्रका आधारमा १४ पुस २०७४ का दिन दिलनाथ गिरी पदमुक्त भएका थिए ।

शरतसिंह भण्डारी
तत्कालीन प्रधानमन्त्री डा. बाबुराम भट्टराईको मन्त्रिमण्डलमा रक्षामन्त्री थिए शरतसिंह भण्डारी । उनले मन्त्री पदमा रहँदा तराई÷मधेसका २२ जिल्लाका जनताले निर्णय गरे विभाजित हुनसक्ने अभिव्यक्ति दिएकै कारण आफ्नो पद गुमाउनु परेको थियो । “तराई नेपालबाट छुट्टिन कसले रोक्छ ?” भन्ने उनको अभिव्यक्ति उनैमाथि आएर बज्रिएको थियो । तत्कालीन फोरम लोकतान्त्रिकका नेता भण्डारीले १ असोज २०६८ मा त्यस्तो अभिव्यक्ति दिएका थिए । निकै लामो समयसम्म विवादित बनेपछि उनले अन्ततः २ कार्तिक २०६८ मा राजीनामा दिएका थिए ।

मातृकाप्रसाद यादव
तत्कालीन नेकपा (माओवादी)का तर्फबाट बनमन्त्री बनेका मातृकाप्रसाद यादव निकै चर्चित र विवादास्पद मन्त्रीहरुमध्येका एक थिए । कहिले स्थानीय विकास अधिकारीलाई शौचालयमा थुन्ने त कहिले आफ्नै प्रधानमन्त्रीसँग ठाडो बोलेका कारण उनी विवादमा तानिएका थिए । गिरिजाप्रसाद कोइराला नेतृत्वको मन्त्रिमण्डलमा यादवले वातावरण विनाश गरी अवैधरुपमा ढुंगाखानी सञ्चालन हुँदा समेत कारबाही नगरेको भन्दै ललितपुरका तत्कालीन स्थानीय विकास अधिकारीलाई मन्त्रालयको शौचालयमा थुनेका थिए ।

स्थानीय विकास अधिकारीलाई शौचालयमा थुनेको विषयलाई लिएर प्रधानमन्त्री र मन्त्रीबीच विवाद चर्कदै गएपछि प्रचण्डले उनलाई राजीनामा गर्न लगाएका थिए । हाल उनी केपी ओली नेतृत्वको सरकारमा उद्योग वाणिज्य तथा आपूर्ति मन्त्रीको जिम्मेवारीमा छन् ।