कसले बनायो प्रधानमन्त्री ओलीलाई आश्चर्यचकित !

काठमाडौं । प्रधानमन्त्री कार्यालयबाट पठाइएको पत्र प्रधानमन्त्री केपी शर्मा ओलीलाई नै जानकारी छैन । पत्र कसले पठायो भन्ने स्पष्ट पारिएको छैन ।

तर, प्रधानमन्त्री ओलीले आफ्नो निर्वाचन क्षेत्रमा विकास आयोजना समावेश गर्न राष्ट्रिय योजना आयोगलाई निर्देशन दिइएको पत्र पुगेपछि प्रधानमन्त्री आश्चर्यचकित परेका छन् । प्रधानमन्त्रीका प्रेस सल्लाहकार कुन्दन अर्यालले योजना आयोगमा कुनै पत्र नपठाएको स्पष्ट पार्दै प्रधानमन्त्री आश्चर्यचकित भएको उल्लेख गरेका छन् ।

प्रेस सल्लाहकार अर्यालले एक वक्तव्य जारी गर्दै सञ्चारमाध्यम र सामाजिक सञ्जालमा उल्लेख गरेझैँ प्रधानमन्त्रीले आफै अध्यक्ष रहेको आयोगलाई पत्र नपठाएको स्पष्ट पारेका छन् ।

“सांसद सम्पर्क कार्यालयमा सङ्कलन गरिएका आयोजनाहरुको सूची प्रधानमन्त्रीको निर्देशनबेगर निजी सचिवालयबाट भूलवशः राष्ट्रिय योजना आयोगमा सम्प्रेषण गरिएको रहेछ”, सल्लाहकार डा अर्यालले जारी गरेको वक्तव्यमा भनिएको छ । प्रधानमन्त्रीको जानकारीमा नरहेको उक्त पत्रबाट ‘प्रधानमन्त्री ओली आश्चर्यचकित र दुःखी हुनुभएको’ वक्तव्यमा उल्लेख छ ।

प्रधानमन्त्रीलाई थाहा नदिइ प्रधानमन्त्री कार्यालयबाट पठाइएको पत्रमा झापा जिल्लाका विभिन्न योजना पार्न राष्ट्रिय योजना आयोगमा पत्र पठाइएको थियो । त्यो पत्र कसले पठायो भन्ने खुलाइएको छैन ।