महतो अध्यक्ष भएपछि राजपाभित्र चर्कियो विवाद

काठमाडौं १२ पुस । राजपामा चक्रीय प्रणालीअन्तर्गत राजेन्द्र महतो अध्यक्ष भएपछि पार्टीभित्र विवाद चर्केको छ । अध्यक्षमण्डलका ६ सदस्यमध्ये अनिल झाले केन्द्रीय समितिको बुधबारको बैठक नै बहिष्कार गरेका छन् ।

बैठक सुरु हुने बेलासम्म उनी पार्टी कार्यालयमै थिए । झानिकट एक नेताका अनुसार कार्यालयको आफ्नै कोठामा बसेर पार्टीका विषयमा छलफल गरे पनि उनी बैठकमा गएनन् । मंसिर ४ मा बसेको बैठकले अध्यक्षमण्डलका संयोजक महन्थ ठाकुरबाट पार्टी नेतृत्व महतोलाई हस्तान्तरण गर्ने निर्णय गरेको थियो । उक्त निर्णयमाथि झाले फरक मत लेखेका थिए ।

बुधबारको राजपा बैठकले पार्टीको साधारण र सक्रिय सदस्यता वितरण अवधि बढाएको छ । यसअघि मंसिर मसान्तसम्मलाई तोकिएको म्याद माघ १५ सम्म पुर्‍याइएको हो । महाधिवेशन तयारीका लागि पुस १८ मा जिल्ला र पुस २५ मा वडास्तरीय विस्तारित बैठक बस्ने निर्णयसमेत बैठकले गरेको छ ।