दिल्लीसँग हारेर प्लेअफबाट बाहिरिएपछि कोहलीले बताए हारको कारण

काठमाडौं। इण्डियन प्रिमियर लिगमा दिल्ली क्यापिटल्सले प्लेअफमा स्थान पक्का गरेको छ । भारतका पूर्वकप्तान महेन्द्र सिंह धोनीको टिम चेन्नइ सुपरकिंग्सपछि प्लेअफमा स्थान बनाउने दिल्ली दोस्रो टिम बनेको छ । अहिले दिल्ली अंक तालिकाको शीर्ष स्थानमा छ । हिजो दिल्लीसँग हारेपछि भारतीय कप्तान विराट कोहलीको टिम रोयल च्यालेन्जर्स बैंगलोर भने प्लेअफ दौडबाट बाहिरिएको छ । अब बाँकी सबै खेलमा ९अरु टिमको खेलमा पनि० बैंगलोरको अनुकूल नतिजा आएमा बैंगलोर प्लेअफ पुग्ने गणितीय सम्भावना त छ तर सबै खेलमा त्यस्तो हुनु असम्भवजस्तै छ । दिल्ली क्यापिटल्समा नेपाली खेलाडी पनि रहेकोले दिल्ली प्लेअफमा पुग्दा नेपाली क्रिकेट फ्यान पनि खुसी छन् ।
हिजो दिल्लीसँग हारेपछि बैंगलोरका कप्तान विराट कोहलीले दिल्लीले मुश्किल अवस्थामा आफूहरुभन्दा राम्रो क्रिकेट खेलेको स्वीकार गरे । विराटले भने ‘हामीले ब्याटिङमा राम्रो सुरुवात गर्यौं । पावरप्ले शानदार थियो । म राम्रो खेलिरहेको थिएँ तर पछि म र एबी डिभिलियर्स यस्तो बलमा आउट भयौं जुन बलमा सामान्यतया हामी आउट हुँदैनथ्यौं । यहीँबाट खेल उल्टियो । दिल्लीका खेलाडीले मुश्किल अवस्थामा हामीभन्दा राम्रो क्रिकेट खेले ।’ कोहलीका अनुसार बैंगलोरले दिल्लीलाई २० रन धेरै बनाउन दिए यही कारण घरेलु टिमले आदर्श स्कोर बनायो । दिल्ली २०१२ पछि पहिलोपटक प्लेअफसम्मको यात्रा तय गरेको हो । २०१२ मा दिल्ली अंक तालिकाको शीर्षमा थियो तर उपाधि भने जित्न सकेन ।
कोहलीले अगाडि भने ‘हामीले टस हार्यौं जो खेलमा निकै अहम साबित भयो । यसका बाबजुद हामीले राम्रो बलिङ गर्यौं । बलरहरुले राम्रो भूमिका निभाए । तर खेल हाम्रो पकडबाट टाढा गयो । यो पिचमा १८५ रनको लक्ष्य हासिल गर्नु मुश्किल थियो त्यो पनि यस्तो अवस्थामा जहाँ दिल्लीको टिममा ३ ठूला स्पिनर थिए । हामीले सोचेका थियौं कि हामीलाई १६० देखि १६५ सम्मको लक्ष्य दिइएमा हामीसँग जित्ने मौका हुनेछ ।’
प्लेअफबाट बाहिरिएपछि बाँकी २ खेलको रणनीतिको विषयमा कोहलीले भने कि उनको टिम मैदानमा खेलको मजा लिन उत्रिनेछ । उनले भने ‘हामीले पहिले नै यही गर्ने फैसला गरेर मैदानमा उत्रिन थालेका थियौं र पछिल्ला ६ मध्ये ४ खेल जित्न सफल भयौं हामी आफूमाथि धेरै दबाब बनाउन चाहँदैनथ्यौं । खेलबाट ‘फ्यान फ्याक्टर’ कहिल्यै टाढा हुनु हुँदैन । हाम्रा २ खेल बाँकी छन् । हामी ती खेल जित्नको लागि कडा मेहनत गर्छौं । यी खेलमा हामी मैदानमा सकारात्मक क्रिकेट खेल्न उत्रिनेछौं ।